Luke 16
Lavapaase Poovo Ri Laradi Loklok Tatao Gugu
1La ne Iesu ga lok ti luvuttadi loklok ka anasa ren keretna, “Lara laradi gap novos aleng, ga ruuna laradi ri lok tatao leven gugu ren; la lentaba luvuttadi diga tong i rin do mo laradi gugu ga gosogos gamasa mi lempilas teren. 2Ni ga ro ka i ukeneng la ga lok tin, ‘Lavanga salai na a ronga limixin di paase mumu u min? Una malagan asu axap luunun at lempanga rak nenu ugak lok tatao i, mila xopmen una epovo xusu nenu laradi gugu rak.’3Melemu laradi gugu ga lok, ‘Ana ba lok lavanga salai? Leeme gomgo rak mo i lok do na lok pes ia at na lugugu. La nia axo epovo lolos kusu ri ke povorok laxangka, la a mamangan bok kusu ri ngising panga. 4Ana aklen lavanga salai nia aba lox i! La do ana xap at na lugugu, aba etangas minedi limixin kusu dibap kup kaka ia uto at laraugu atdi.’
5Kuren la ni ga xup kaka nedi limixin diga sing ka lempanga at leeme gomgo ren. La ni ga lok ti laradi avot, ‘Lavanisa lempanga nenu una vorang i at leeme gomgo rak?’
6La mo laradi avot ga lok, ‘Lavanuan sangaun kobot (800) buxom at la olip.’
La laradi gugu ga lok tin, ‘Lok kaka na lovoang ti vaase axasev u mi lempanga nenu una vorang i la una xis kopok la una malagan asu lavanuet sangaun kobot (400).’
7La ni ga lok ti mo lara laradi mumu, ‘La nenu, lavanisa nenu una vorang i?’
La laradi mumu ga lok, ‘Leges abin sangaun kobot (1000) laxan lutlut piao.’
La laradi gugu ga lok tin, ‘Lok kaka i na lovoang papaase axasep la una malagan lavanuan sangaun kobot (800).’
8La leeme gomgo at nom laradi babala ga long lenget lodoxoma at laradi gugu la ga lok tin keretna, ‘Lakleklen taram i silok aleng.”
La ne Iesu ga lok keretna, “I ruturun aleng. Limixin at na lavatbung menemen dikleklen aleng ti lok leven gugu kantubu atdi. Ketla limixin at ne Moroa kopmen dina gugu avukat mi lugugu at ne Moroa.” 9La ne Iesu ga lok bok tidi xeretna, “A tong i rinimi do mina lok kaka lempilas la minam taba limixin min kusu diba etangas avukat minimi; mila do lempilas na xap asonao, Moroa ba lam kaka nimi uto at loogu ren i nemen amisik.
10Do nege i ruturun at lempanga lixilik, neni naba ruturun bok at lempanga silok; la do nege i xaxarang at lempanga lixilik, neni naba xaxarang bok at lempanga silok. 11Mo do kopmen mi goxo ruturun tik lok tatao lempanga at na lavatbung menemen, kopmen tara naba raba nimi mi nom lapnovos tuturun at ne Moroa. 12La mo do mi goxo ruturun at lempanga at lara vetpes, Moroa noxo raba nimi mi lempanga atnimi, ik lok no vana at laxalibet.
13Lasaxaruki kopmen na epovo xusu na gugu ri tegepu radi silok; neni naba belemamao lara la na balamu mo lara; neni naba ruturun ti lara la na sok tixirixes kepe tara. La kerepmo kopmen mina epovo xusu mina lotu ruturun saparap ne Moroa la mina doxoma mumu amisik lapnovos at na lavatkangka.”
14Lubung Parisi diga ronga i na; la diga lok kalise ne Iesu, mila diga vavara aleng lempilas. 15La ne Iesu ga lok tidi, “Nemi vam nom mik lok do minak mokso at lemeren limixin, ketla ne Moroa ikleklen i do keneng at lebelen nimi i umsu mi laxakapmek. Do lavanga salai limixin di doxoma i do i silok aleng, nom i ngan lavanga gamasa at lemeren ne Moroa.
16Lenavolo at ne Moses la levenmamalagan at lavaeme vapaase alii ga nemen se at levenaleng at ne Jon laradi sep susu. Ga ru ka i go Lagale Lavavang mumu Linintoo at ne Moroa ga lok kun i min, la buaang nedi limixin getgesara di lolos do ukeneng di. 17Kopmen na lolos do laxalibet mi na lavatkangka naba xap, ketla i lolos aleng ti tamangkot lixilik keneng at levelinga at Lenavolo xusu naba sonao.
18Do taradi na soxepe latkin teren, la na epot ka tatkin petpes, neni ira longka vam; la do taradi i epot at tatkin, latlok teren ga soxepe i, neni bok ira longka vam.”
Lasaro La Laradi Gap Novos
19La ne Iesu ga lok bok, “Laradi gapnovos gang siga levesingsiga ga lok nunuan aleng, la at levenaleng axap gantuuna laxampanga solo. 20Lara laradi banbalo bok ga nemen, laasen teren ne Lasaro, labantuxu ren ga umsu mi laxanabi, la amisik digak lok kaka i uto at lumusmaragu at loogu at nom laradi nopnovos. 21Neni ga doxoma i do naba anan lengkonmumus luxa mo gam subu su boro at loxonin anan at nom laradi nopnovos. Lubungman bok digam dem laxanabi ren.22At lara laaleng laradi banbalo ga met la lubung angelo diga xip kaka i uto saparap ne Abaram, to vana at laxalibet; la nom laradi nopnovos bok ga met la digak mir i. 23Neni ga suma aleng langsangan losongsongot to Edesa, la ni ga milik aurut la ga ven ne Abaram gak lok paxalom tinotno, eburu mi ne Lasaro go saparav i. 24La neni ga xup lolos keretna, ‘Tamak ne Abaram, una balamu ia, la una riki ne Lasaro xusu na song arup lisivisip teren uto at taxadan, la na lox amumudut lagam tarak min; nia na a nemen at langsangan losongsongot keneng at na laxao!’
25Ketla ne Abaram ga lok, ‘Nuruk, una doxoma i na. At lorooro ram uga ruuna laxampanga solo, la ne Lasaro ga lok kaka lempanga xapmek; ketla na nga neni mo i momo aleng nade, la nenu nga mo ura nemen keneng at langsangan losongsongot. 26La lavanga bok na, langsangan lavagam i si aleng ik midi kantubu atda, kusu do nege na vas kaxat mede la udom, kopmen noxo epovo; la tara medom ixo epovo xusu na volo ude.’
27Laradi nopnovos ga lok, ‘I lox avukat mene nga; a sing u do una riki ne Lasaro uto at loogu at ne tamak, 28kusu neni nabat pas la na vaase aronga bok lavalimo luvutnetak la di noxot pas bok ti na lemenemen songsongot.’
29Abaram ga lok tin keretna, ‘Luvutnetam di ruuna levelinga keneng at Lenavolo at ne Moses eburu mi levelinga at lavaeme vapaase alii xusu ri vaase aronga di; i epovo do luvutnetam dina ronga mo levelinga’.
30Laradi nopnovos ga lok, ‘Tamak ne Abaram; kopmen na epovo! Ket do tara na xatu kaxat amlong basinge lanmet la nat pas uto saparap di, agut diba leeng ba basinge laxakapmek atdi.’
31Ketla ne Abaram ga lok, ‘Mo do di noxo ronga Lenavolo at ne Moses mi levelinga at lavaeme vapaase alii, di noxo leeng basinge laxakapmek atdi. La do tara na xatu kaxat amlong basinge lanmet la na vaase ridi, move di noxo leeng.”
Copyright information for
MMX